சிதம்பர சக்கரம்
==============

சித்தம் ஆகாசத்தொடு இணையும் போது அதுவே சிதம்பரம். இங்கே கொடுக்கப்பட்ட 'சிதம்பர' சக்கரத்தில் பஞ்சாட்சரம் மந்திரம் உண்டு. வாலையை உணர்ந்தால் அதுவே சச்சிதானந்தம். (சத்+சித்து+ஆனந்தம்)

"ஐம்பதொரட்சரந்தான் ஆச்சு,
நெஞ்ஜெழுத்தாலே நினையா மலந்த
நிசந்தெரியுமொ வாலைப் பெண்ணே.
நோக்கிகோல் வாசியை மேலாக வாசி,
நிலையைப் பாரடி வாலைப் பெண்ணே.
சிதம்பர சக்கரம் தானரிந்தார்
சீமையில் உள்ள பெரியோர்கள்
சிதம்பர சக்கரமென்றால் அதற்குள்
தெய்வத்தை யல்லவோ அறிய வேணும்"

இந்த சக்கரத்தில் பஞ்சாட்சர மந்திரம் சுழற்சி முறையில் நமக்கு இடமிருந்து வலமாக, வந்து கொண்டே இருக்கும். அதாவது வாசியோகத்தில் இருக்கும் எவருக்குமே சித்திக்கும் இந்த ஜோதியானது, சஹாஸ்ரத்தில் மேல்நோக்கியே இருக்கும். ‘உன் உடலை வெறும் உப்பிட்ட பாண்டம் என்று மட்டும் எண்ணாதே, அதை பேணவேண்டும்’ என்கிறார்கள் சித்தர்கள். காலங்கிநாதர், போகர், போன்ற சித்தர்கள் எல்லோருமே மேலே சொன்ன இந்த வரிகளை தங்கள் பாடல்களில் சொல்லியுள்ளனர்.

செப்பு தகட்டில் இந்த சக்கரத்தை செய்து வைத்துள்ளவர்கள், முறையாக அதை ஆராதிக்க வேண்டும். பாலில் சிறிது மஞ்சள் பொடியை கலந்து அதை இந்த சக்கரம் மேலே கையால் தேய்த்து பூசி, மையத்தில் குங்குமம் இட்டு வெள்ளை மலர்கள் சாற்றி , தூபம் காட்டியபின். தங்கள் தியானத்தை செய்து வரவேண்டும். சில வாரங்களிலோ, மாதங்களிலோ, வருடங்களிலோ அது உங்களை அறியாமல் உங்களுக்குள் ஆன்ம சிந்தனை தந்து சித்த ஆற்றலை பெருக்கும்.

உங்கள் ஆதார சக்கரத்தின் சக்தி நிலைக்கு ஏற்பத்தான் இந்த உயர்வு அமையும். நம் உடலில் உள்ள ஆறாதார சக்கரங்களான மூலாதாரம் முதல் ஆக்னேயம்வரை அனைத்து கதவுகளையும் திறந்து கொண்டுபோனபின் கபாலம் என்ற சிரசில் இலயிக்க ஆனந்தம் தோன்றும். சிலருக்கு சிலது இயங்கும் சில சக்ரங்கள் பழுதுபட்டிருக்கும். அதில் தடையில்லாமல் ஓட்டத்தை உண்டாக்க வேண்டும் என்கிறார்கள்.

நம் மனதை அடக்கியாளவும் அமைதிபடுத்தவும் மனதையே கட்டளைகள் பிரப்பிக்கவைத்து  உடன்படுத்தமுடியாது, அது நடக்காது. அதை திசைத் திருப்பத்தான் மூச்சுப் பயிற்சி செய்ய வேண்டும், அந்த மூச்சின் ஓட்டத்தை அண்ணாக்கின் மேலே மானசீகமாக நின்று கவனிக்கவேண்டும். இதன் அதீத ஆழ்ந்த முறைதான் வாசி பயிற்சி. இதன் மூலம் சக்கரங்களை திறந்துகொண்டு ஆகாய வாசலுக்கு செல்லலாம் என்கிறார்கள். ஆறாதார சக்கரங்கள்தான் பூமி, சஹாஸ்ரம்தான் ஆகாயம், மூலதாரத்துக்கு கீழே முழங்கால்வரை பாதாளம், அதன் கீழே பாதம் வரை அதல பாதாளம் என்று சக்தி சக்கரங்கள் /கதவுகளை வரிசை படுத்தியுள்ளனர்.

இவ்வாரக தெய்வம் இருக்கையில், புத்தி கெட்ட மாண்பர்கள், தங்கள் ஆகாச சக்ரத்தின் கதவு திறந்து வாலை தெய்வத்தை காணமலே சாகின்றதேன் என்று கேள்வி கேட்கிறார் போகர்.